SBI Zero Balance Account - Benefits...

SBI Zero Balance Account 
SBI జీరో బ్యాలెన్స్ అకౌంట్‌తో ఎన్నో లాభాలు.. ఇలా తెరవండి!
దేశీ అతిపెద్ద బ్యాంక్ స్టేట్ బ్యాంక్ ఆఫ్ ఇండియా (ఎస్‌బీఐ) తన కస్టమర్లకు ఎన్నో రకాల సేవలు అందిస్తోంది. ఇందులో జీరో బ్యాలెన్స్ అకౌంట్ సర్వీసులు కూడా ఒక భాగమే. కేవలం స్టేట్ బ్యాంక్ మాత్రమే కాకుండా హెచ్‌డీఎఫ్‌సీ బ్యాంక్, ఐసీఐసీఐ బ్యాంక్ వంటివి కూడా జీరో బ్యాలెన్స్ అకౌంట్ సేవలు ఆఫర్ చేస్తున్నాయి.
ఇది కూడా సేవింగ్స్ ఖాతానే
జీరో బ్యాలెన్స్ అకౌంట్‌ కూడా ఒక రకమైన సేవింగ్స్ ఖాతానే. అయితే ఇందులో బ్యాంక్ కస్టమర్ మినిమమ్ బ్యాలెన్స్ కలిగి ఉండాల్సిన అవసరం ఉండదు. ఎస్‌బీఐ బేసిక్ సేవింగ్స్ బ్యాంక్ అకౌంట్ (జీరో బ్యాలెన్స్ బ్యాంక్ అకౌంట్) ప్రధానంగా పేద ప్రజలు లక్ష్యంగా అందుబాటులోకి వచ్చింది. ఎలాంటి భారం లేకుండా పేదలకు కూడా బ్యాంకింగ్ సర్వీసులు అందుబాటులో ఉంచడమే జీరో బ్యాలెన్స్ అకౌంట్ ఉద్దేశం. బ్యాంక్‌కు వెళ్లి ఖాతా తెరవాలి.
ఎవరైనా ఓపెన్ చేయొచ్చు
స్టేట్ బ్యాంక్‌లో జీరో బ్యాలెన్స్ అకౌంట్‌ను ఎవరైనా తెరవొచ్చు. భారతీయ పౌరులై ఉండాలి. కేవైసీ డాక్యుమెంట్లు అవసరం అవుతుంది. ఆధార్ కార్డు, ఓటర్ కార్డు, డ్రైవింగ్ లైసెన్స్ వంటి డాక్యుమెంట్లు ఉంటే సరిపోతుంది. ఒకరి పేరుపై లేదా ఇద్దరు కలిసి ఈ ఖాతాను తెరవొచ్చు.
జీరో బ్యాలెన్స్
సాధారణంగా బ్యాంకులు మినిమమ్ బ్యాలెన్స్ రూల్స్‌ను కలిగి ఉంటాయి. బ్యాంక్‌లో అకౌంట్ కలిగిన వారు కచ్చితంగా వారి ఖాతాల్లో మినిమమ్ బ్యాలెన్స్‌ను మెయింటెన్ చేయాలి. లేదంటే చార్జీలు పడతాయి. అయితే జీరో బ్యాలెన్స్ అకౌంట్‌కు ఈ రూల్స్ వర్తించవు. ఎలాంటి మినిమమ్ బ్యాలెన్స్ కలిగి ఉంటాల్సిన అవసరం లేదు.
వడ్డీ రేటు సమానం
ఎస్‌బీఐ రెగ్యులర్ సేవింగ్స్ బ్యాంక్ అకౌంట్‌కు ఎలాంటి వడ్డీ రేట్లను నిర్ణయిస్తుందో.. జీరో బ్యాలెన్స్ అకౌంట్‌కు కూడా ఇవే వడ్డీ రేట్లు వర్తిస్తాయి. అంటే రెండు అకౌంట్లకు ఒకేరకమైన వడ్డీ వస్తుంది. ప్రస్తుతం బ్యాంక్ రూ.లక్షలోపు డిపాజిట్ ఉన్న అకౌంట్లకు 3.25 శాతం వడ్డీ అందిస్తోంది.
చెక్‌బుక్ ఉండదు
స్టేట్ బ్యాంక్‌లో జీరో బ్యాలెన్స్ సేవింగ్స్ అకౌంట్ తెరిచిన వారికి చెబ్‌బుక్ ఫెసిలిటీ ఉండదు. పేద ప్రజలు లక్ష్యంగా ఈ అకౌంట్ సేవలు అందుబాటులోకి తీసుకువచ్చారు. అందువల్ల వారికి చెక్‌బుక్‌తో పని ఉండదు. అందుకే ఈ సర్వీసులు వారికి లభించవు. ఒకవేళ చెక్‌బుక్ కావాలంటే జీరో బ్యాలెన్స్ అకౌంట్‌ను రెగ్యులర్ సేవింగ్స్ ఖాతాగా మార్చుకోవాలి.
వేరే బ్యాంక్ అకౌంట్ ఉండకూడదు
స్టేట్ బ్యాంక్‌కు వెళ్లి జీరో బ్యాలెన్స్ అకౌంట్ తెరవాలంటే.. ఇతర బ్యాంకుల్లో మరే సేవింగ్స్ ఖాతా ఉండకూడదు. ఒకవేళ ఉంటే జీరో బ్యాలెన్స్ అకౌంట్‌ను తెరవడం వీలుకాదు. పాత అకౌంట్‌ను క్లోజ్ చేసి కావాలనుకుంటే జీరో బ్యాలెన్స్ అకౌంట్ తెరవొచ్చు.
ఏటీఎం క్యాష్‌ విత్‌డ్రా ఫ్రీ
జీరో బ్యాలెన్స్ అకౌంట్ కలిగి వారు నెలకు 4 సార్లు ఏటీఎం నుంచి ఎలాంటి చార్జీలు లేకుండా క్యాష్ విత్‌డ్రా చేసుకోవచ్చు. ఈ పరిమితి దాటితే అప్పుడు బ్యాంక్ విత్‌డ్రాయెల్స్‌పై చార్జీలు విధిస్తుంది.
ఉచిత డెబిట్ కార్డు
స్టేట్ బ్యాంక్ జీరో బ్యాలెన్స్ సేవింగ్స్ అకౌంట్ కలిగిన వారికి బేసిక్ రూపే ఏటీఎం కమ్ డెబిట్ కార్డును ఉచితంగా అందిస్తుంది. అలాగే వార్షిక మెయింటెనెన్స్ ఫీజు కూడా ఉండదు. ఉచితంగానే డెబిట్ కార్డు సొంతం చేసుకోవచ్చు. అకౌంట్ క్లోజ్ చేసుకోవడానికి కూడా చార్జీలు ఉండవు