నిజాం ఆస్తుల కేసు.. పాకిస్థాన్‌కు షాకిచ్చిన యూకే హైకోర్టు

1948లో నిజాం నవాబు దగ్గర ఆర్థిక మంత్రిగా పని చేసిన నవాజ్ జంగ్ పది లక్షల పౌండ్లను పాకిస్థాన్ హై కమిషనర్ ఖాతాలోకి మళ్లించారు. తన అనుమతి లేకుండా ఈ నిధులను మళ్లించారని నిజాం నవాబు చెప్పారు. దీంతో ఈ నిధుల వ్యవహారం వివాదాస్పదమైంది.

దశాబ్దాల క్రితం నాటి నిజాం ఆస్తుల కేసులో యూకే హైకోర్టు పాకిస్థాన్‌కు షాక్ తగిలింది. భారత్‌లో హైదరాబాద్ స్టేట్ విలీనానికి ముందు నిజాం నవాబు పాకిస్థాన్‌కు పంపిన నగదుకు సంబంధించి దాయాదికి వ్యతిరేకంగా కోర్టు తీర్పునిచ్చింది. 1948, సెప్టెంబర్ 20 నుంచి ఈ కేసులో భారత్, పాక్, నిజాం వారసుల మధ్య వాదనలు సాగుతున్నాయి. పది లక్షల పౌండ్లు కాస్తా.. వడ్డీతో కలిపి ఇప్పుడు 35 మిలియన్ పౌండ్లకు చేరాయి. ఆయుధాల కొనుగోలు కోసం నిజాం ఆ నిధులను తమకు బదలాయించారన్న పాకిస్థాన్ వ్యాఖ్యలను యూకే హైకోర్టు తోసిపుచ్చింది.

ఇంతకూ ఏమైందంటే.. 1948 సెప్టెంబర్‌లో నిజాం సంస్థానం భారత్‌లో విలీనమైన సంగతి తెలిసిందే. అంతకు కొద్ది రోజుల ముందు నిజాం సంస్థానంలో ఆర్థిక మంత్రిగా పని చేసిన నవాజ్‌ జంగ్‌.. పది లక్షల పౌండ్లను లండన్‌లోని పాక్‌ హైకమిషనర్‌ హెచ్‌ఐ రహీమ్‌తులాకు చెందిన నేషనల్‌ వెస్ట్‌మినిస్టర్‌ బ్యాంక్‌ ఖాతాలో జమ చేశారు. భారత్‌లో హైదరాబాద్ స్టేట్ విలీనం జరిగాక ఈ నిధుల బదలాయింపునకు తన అనుమతి లేదని అప్పటి ఏడో నిజాం మీర్‌ ఉస్మాన్‌ అలీ ఖాన్‌ చెప్పారు. కానీ ప్రయోజనం లేకపోయింది.

హైదరాబాద్‌ సంస్థానం అప్పటికే భారత్‌లో విలీనం కావడంతో.. నవాజ్‌ జంగ్‌ అనుమతి లేకుండా ఆ నిధులను వెనక్కు మళ్లించలేమని బ్యాంక్‌ తేల్చి చెప్పింది. దీంతో నిజాం ఆ నిధుల కోసం కోర్టుకెక్కారు. నిజాం స్వతంత్ర పాలకుడు కాడని, ఒకప్పటి హైదరాబాద్‌ సంస్థానానికి చెందిన ఆ నిధులు తమకు చెందుతాయని భారత్‌ వాదించింది. దీంతో ఈ వివాదం కాస్తా ముదిరింది.

కాలక్రమంలో ఆ నిధులున్న బ్యాంకు రాయల్‌ బ్యాంక్‌ ఆఫ్‌ స్కాట్లాండ్‌గా మారింది. మీర్‌ ఉస్మాన్‌ అలీ ఖాన్‌ వారసుడిగా ఆయన మనవడు నవాబ్‌ నజఫ్‌ అలీ ఖాన్‌ ఈ కేసులో పార్టీగా చేరారు.