తృణధాన్యాలు పెట్టండి విద్యార్థులకు మధ్యాహ్న భోజనంపై రాష్ట్రాలకు కేంద్రం లేఖ

తృణధాన్యాలు పెట్టండి
విద్యార్థులకు మధ్యాహ్న భోజనంపై రాష్ట్రాలకు కేంద్రం లేఖ
 విద్యార్థులకు పాఠశాలల్లో పెట్టే మధ్యాహ్న భోజనంలో పోషకాలు అధికంగా ఉండే తృణధాన్యాలను వినియోగించాలని కేంద్ర మానవ వనరులశాఖ రాష్ట్ర ప్రభుత్వాలకు సూచించింది. ఈ మేరకు ఆ శాఖ సంయుక్త కార్యదర్శి ఆర్‌సీ మీనా అన్ని రాష్ట్రాలు, కేంద్ర పాలిత ప్రాంతాలకు లేఖ రాశారు. వీటిని వినియోగించడం వల్ల విద్యార్థులకు సూక్ష్మపోషకాలతోపాటు, బి-కాంప్లెక్స్‌ అంది వారికి బహుముఖ ప్రయోజనాలు కలుగుతాయని పేర్కొన్నారు. అందుబాటులో ఉండే జొన్నలు, సజ్జలు, రాగులు, అరికెలను నూక, పిండి రూపంలో పిల్లలకు అందించాలన్నారు.  కర్ణాటకలో అక్షయపాత్ర ఫౌండేషన్‌ సరఫరా చేసిన తృణధాన్యాల ఆధారిత మధ్యాహ్నభోజనం తిన్న పిల్లల్లో 50% అధికవృద్ధి ఉన్నట్లు ఇక్రిశాట్‌ అధ్యయనంలో తేలిందని మీనా తన లేఖకు అనుబంధంగా జతచేసిన సమాచారంలో పేర్కొన్నారు. ఆంధ్రప్రదేశ్‌లోని శ్రీకాకుళం జిల్లాలో ఐసీడీఎస్‌ కింద 3 నుంచి 6 ఏళ్ల చిన్నారులకు వారానికి నాలుగు రోజులు చిరుధాన్యాలతో కూడిన భోజనం అందిస్తున్న విషయాన్ని గుర్తు చేశారు. దీనివల్ల ఆ పిల్లల్లో 42% ప్రొటీన్లు, 2.6 రెట్లు కాల్షియం, 5 రెట్లు ఇనుము, 59% జింక్‌ పెరిగినట్లు తెలిపారు.